Судлар фаолиятида гендер тенгликни таъминлаш
Мамлакатимизда гендер тенгликни таъминлаш давлат сиёсати даражасидаги долзарб масала ҳисобланади. Жамиятда ва давлат органлари фаолиятида хотин-қизларнинг ролини ошириш, уларнинг иштирокини таъминлаш асосий мезон бўлиб хизмат қилмоқда.
Гендер тенгликни шакллантириш юзасидан кўплаб норматив-ҳуқуқий ҳужжатлар қабул қилинган бўлиб, Асосий Қонунимизнинг 58-моддаси ушбу нормативлар учун бош мезондир. Унга кўра, хотин-қизлар ва эркаклар тенг ҳуқуқлидирлар. Давлат хотин-қизлар ва эркакларга жамият ҳамда давлат ишларини бошқаришда, шунингдек жамият ва давлат ҳаётининг бошқа соҳаларида тенг ҳуқуқ ва имкониятларни таъминлайди.
Гендер тенгликдаги ушбу кафолатлар хотин-қизлар учун кенг имконият бўлиши билан биргаликда улкан масъулият ҳамдир.
Бугунги кунда суд тизимида ҳам аёллар фаолияти кўламини оширишга эътибор ортиб бормоқда.
Давлатимиз раҳбари томонидан 2025 йил 24 ноябрда қабул қилинган “Судьялар ҳамжамияти органлари фаолиятининг самарадорлиги ва очиқлигини ошириш ҳамда суд мустақиллиги кафолатларини янада кучайтириш чора-тадбирлари тўғрисида”ги ПФ-227-сон Фармонида суд тизимида гендер тенгликни таъминлаш имкониятларини кенгайтириш орқали аёл судьялар улушини камида 30 фоизга етказиш мақсади илгари сурилган. Шунингдек судьялар корпусида гендер тенгликни таʼминлаш мақсадида:
Кенгашнинг Одил судлов академиясининг касбий қайта тайёрлаш курсларига қабул қилишда ҳар йили заруратга қараб Кенгаш томонидан хотин-қизлар учун квота белгилаш ҳақидаги таклифига розилик берилиши;
ташаббускор судьялар гуруҳи томонидан Ўзбекистон аёл судьялар ассотсиациясини ташкил этиш бўйича таклиф ишлаб чиқилгани маълумот учун қабул қилиниши белгиланган.
Суд тизимида камида беш йиллик меҳнат тажрибасига ва илмий салоҳиятга эга судьялар қонунчиликда белгиланган тартибда Одил судлов академиясига профессор-ўқитувчи лавозимига тайинланганда Академиядаги фаолияти тугагандан соʻнг унинг муқаддам ишлаган судьялик лавозимида ишни давом эттириши, бўш турган судьялик лавозими бўлмаган тақдирда, розилиги билан аввалгисига тенг бошқа судьялик лавозимига ўтказилиши белгиланган.
Судлар фаолиятида гендер тенгликни таъминлаш илмли, салоҳиятли ва масъулиятли аёл кадрларни шакллантиришга кенг йўл очади.
Сурхондарё вилоят маъмурий суди
судья катта ёрдамчиси Р.Тожимуродова